البوابة
الله امــر بالوصـل من بين الاقـــــــراب حنا بوقــت زايــدٍ بالقطيعــــــــه
وانا من اللــي شفت بالحيـل منصـــاب وضاقت علـيّ الأرض لو هي وسيعه
يابــوي أنا من صدتك عارضـي شــــاب وحطيت في كبـدي جــروح شنيعـة
ماغير أهوجس مثل منهار الأعصـــاب أنا أشهد إن صدتك عنــي وجيعــه
ولا لقيت لها تفاسيــــر واسبـــــــاب ومعاتبتك محرمــة فـي الشريعــه
شفت المهـونة من شبـــاب وشيـــــاب وأنـا عن الحقران نفســي رفيعـــه
لانـــي بسربوت ولانـــــي بكــــذاب ولا لــي مع الأنـذال شرية وبيعـه
يابـوي أفك البـاب وتسكــــر البـــاب خصيتنــي يابــوي في ذا الطبيعـه
حتى أصغر الأخوان كشر لـي النـــاب ماكنــي إلا بايـــق لـــي وديعـــه
ولا احدٍ أخذ لي شور في كـل الأنسـاب يالله دخيلك من حيـــاة الهزيعــه
يوم إني زايل يايبة صرتـوا احـــزاب احدٍ نصى الهيضل واحدٍ بالبديعه
ترى المعونة جات من رب الأربـــاب لاحدٍ يحسب إني برجوى صنيعه
لكن أبي جمع القرايب والأحبـــــاب قدام كلٍ يغـرق المــوت ريعــــــه
صاروا اخواني عند ورعاني أغـــراب شــيٍ يولــع في ضميري وليعــــه
ليسئلوني يغـرق الدمـــع الأهـــداب يالله عسى من لامنــي بالفجيعــه
يونس على كبده مثل عضــة الــداب وارحم عيالـه لاومــر مايطيعـــه
يابــوي طيرك له جنــاح ومخــلاب يحط في ربد الحبــاري فنيعـــه
ماهو بحق إنك تحطــــه بســرداب وتحملــه من فوق مايستطيعـــه
حطه على يمناك وتشوف الإعجـاب وافخر بطلعاته مع أهل الطليعه
